SOEK HIER VIR BYBELGEDEELTES


Tik die naam van die Bybelboek wat jy soek hieronder in om die resultate te "filter". Dit sal jou baie gou wys of die hoofstuk of perikoop wat jy soek hier beskikbaar is.

Die vorige alfabetiese lys is steeds hier, maar sal nie langer opgedateer word nie.



Kerkjaar 2015-16

 

 

File Version Licence Size Added Hits

Vierde Sondag in Advent – 20 Desember 2015 - Lukas 1:47-55

Lukas1 47-55Bybelmedia se Woord en Fees stel voor dat jy 'n lied uit die fliek The Hunchback of Notre Dame, met die titel "God help the Outcasts", gebruik. Die Gypsy-vrou Esmeralda sing 'n lied aan Maria, waarin sy vra wie na haar mense sal omsien. Of jy kan gesels oor die feit dat God nie gesê het “Maria is maar net ’n jong meisie” nie. Hy het haar ernstig opgeneem, haar vertrou en vir haar ’n opdrag gegee. Ook kinders is in staat daartoe om, soos Maria, wonderlike dinge vir God te doen. Vertel dan stories van ander dapper, uitgesproke jongmense, bv. Malala Yousafzai van Pakistan wat die jongste mens is wat nog ooit die Nobelprys vir vrede gewen het, óf Mariah Smith van Hampton, Virginia in die VSA, wat 17 was toe sy hawelose mense begin help het deur haar organisasie, Blankets for the Homeless, óf die skaam 14-jaar oue Aziza Rahimzada wat ’n kragtige stem geword het vir die kinders in Afghanistan se vlugtelingkampe en vanjaar, vier jaar later, genomineer is as een van drie finaliste in die Internasionale Kinder Vredeprys. Die preekriglyn sluit hierby aan en vertel die verhaal van ‘n sewentienjarige Colombiaanse meisie – in die rolprent Maria Full of Grace – wat doelgerig en vasberade ontsnap het uit haglike omstandighede, al moes sy die reëls buig om te oorleef. Die vraag is waar is God in hierdie Maria, die arm Colombiaanse meisie, se lewe? Is God die outeur van nuwe moontlikhede, soos ‘n mens in haar lewe begin raaksien? Kan ons vandag nog daarop hoop dat God mense uit hulle ellende optel en vir hulle nuwe geleenthede skep? Dit is met hierdie lens wat die verhaal van Maria in die Bybel op die tafel kom en wat ons God se werk in dié wêreld op ‘n ander, meer gevaarlike manier, begin raaksien.

Lukas 1:47-55.ppt 654 KB Dec 13, 2015 07:11 Download 596
Lukas 1:47-55.pptx 596.51 KB Dec 13, 2015 07:09 Download 545
Lukas 1:47-55.doc 392.5 KB Dec 13, 2015 07:09 Download 699

Derde Sondag in Advent – 13 Desember 2015 - Sefanja 3:14-20

Sefanja3-14-20Gesels met die kinders oor die "prentjies" wat hulle van God het. Na aanleiding van Sefanja 3 help die kinders om aan God te dink as die God wat glimlag, dit is immers wat hierdie Sondag wil kommunikeer. Daar is ook ‘n prettige storie van “Uh-oh!” deur Shutta Crum wat jy en die kinders saam kan vertel. Die preekriglyn vertel die verhaal van die bejaarde vrou in die Waarheids- en Versoeningskommissietyd wat wys hoe vergifnis en 'n nuwe kan begin grondvat in ons land. Sy het polisieman Van de Broek vergewe dat hy haar man en kind vermoor het nie, maar hom in haar familiekring ingetrek om hom ‘n nuwe begin te gee. Sowaar: daar is vergifnis moontlik, selfs vir die grootste sondaars. Hiervan getuig die profeet Sefanja juis in hierdie Adventstyd. Die nabyheid van God verseker ons van twee dinge. Dit bring 'n einde aan die oordeel sodat ons met blydskap deel kan hê aan die vernuwende teenwoordigheid van Jesus. Dit bring ook die herstel en regverdiging van die kerk van die Here teenoor 'n vyandige wêreld.

Sefanja 3:14-20.ppt 745 KB Dec 07, 2015 05:19 Download 588
Sefanja 3:14-20.pptx 610.61 KB Dec 07, 2015 05:18 Download 638
Sefanja 3:14-20.doc 121.5 KB Dec 07, 2015 05:17 Download 685

Tweede Sondag in Advent – 06 Desember 2015 - Maleagi 3:1-4

Maleagi3-1-4In Familietyd kan jy ‘n video wys van iemand wat glas blaas en die inleiding van die preek gebruik as familie-oomblik. Jy kan ook die ontmoeting van die kinders met die leeu Aslan in C.S. Lewis se boek “The Lion, the Witch and the Wardrobe” gebruik. Lucy was bekommerd dat hy nie veilig is nie. “Veilig?” het Mnr. Bewer gesê. “Wie het iets gesê oor veilig? Natuurlik is hy nie veilig nie. Maar, hy is goed. Hy is die Koning.” Jy kan ook ‘n gesprek voer oor die waarde van slegte medisyne. Die preekriglyn werk met die verhaal van Simon, ‘n glasblaser, wat glasprodukte in die vuur van die smeltkroes skep. In ons teks is reiniging ook ter sprake, omdat die volk van God suiwering nodig het. Ons teks moedig ons aan om ook ons lewe voor God oop te stel vir suiwering, en om sodoende gestroop te word van alles wat "pronk en sieraad" is. Eerder as 'n boodskap van straf en verdoemenis, word die teks 'n uitnodiging tot inkeer en 'n voorbereiding om die Een te vier wat ons in voorbeeld kom wys het hoe 'n lewe na God se hart werklik lyk. Ons is tans in die Kerstyd. Ons vier die koms van die Een wat deur Maleagi en later Johannes die Doper aangekondig is. Die Een wat kom ons ons lewens te vernuwe, deur Woord en Gees. Laat ons in die Kerstyd bid: O, kom Skepper Gees, o kom Lewende Here Jesus Christus en vernuwe ons!

Maleagi 3:1-4.ppt 1.04 MB Nov 30, 2015 07:25 Download 588
Maleagi 3:1-4.pptx 745.53 KB Nov 30, 2015 07:24 Download 529
Maleagi 3:1-4.doc 110.5 KB Nov 30, 2015 07:22 Download 639

Eerste Sondag in Advent - 29 November 2015 - 1 Tessalonisense 3:9-13

1Tessalonisense3-9-13Om die effens moeiliker teks met kinders te deel, lees dit uit ‘n makliker vertaling. Daar is ook ‘n inkleurprent beskikbaar. Die preekriglyn werk met die verhaal van die huis waarvan die liggies vir Kerstyd gebrand het lank nadat Kerstyd al verby was. Regdeur Januarie en naderhand ook Februarie het die liggies in die aande bly brand. Dit het nogal vreemd gelyk. Teen die middel van Maart het daar skielik nog liggies, wat woorde uitgespel het, op die huis verskyn. Dit het gesê: "Welkom tuis, Jimmy!" Dié gesin het 'n seun wat in die Midde-Ooste in een of ander Amerikaanse oorlog gaan veg het en vir die gesin was Kersfees nie Kersfees voordat hulle nie weer met hulle seun herenig was nie. Kersfees is daarom 'n tyd om te fokus op liefdesbande, 'n tyd waar gesinne en families bymekaar moet wees. Dit verskaf ‘n goeie oorgang na die verhaal in ons teksgedeelte wat ons van die innige liefdesbande vertel wat geloof in die Here Jesus Christus tussen Paulus, sy medewerkers en die gemeente in Tessalonika gesmee het. Ons ontdek hier hoe normaal hierdie diep verbintenisse in die gemeente van Christus is. Mag ons eie liefde vir mekaar op dieselfde manier hierdie seisoen toeneem.

1 Tessalonisense 3:9-13.ppt 2.14 MB Nov 23, 2015 12:02 Download 655
1 Tessalonisense 3:9-13.pptx 1.21 MB Nov 23, 2015 12:01 Download 520
1 Tessalonisense 3:9-13.doc 117.5 KB Nov 23, 2015 12:00 Download 645

Kerkjaar 2014-15

Die Seisoen van Luister voorsien elke week 'n PowerPoint en Word hulpmiddel vir gebruik saam met die fokusteks van die Woord en fees - Preekstudies en liturgiese voorstelle gebaseer op die kerkjaar wat Bybel-Media in samewerking met Communitas uitgee.

Die uitgangspunte is die volgende:

  • Dit sluit direk aan by die Seisoen van Luister se kultuur, styl en metodiek.
  • Dit sluit direk aan by die Woord en fees - Preekstudies met Liturgiese voorstelle gebaseer op die kerkjaar.
  • Dit gebruik visuele media en verhale om ‘n erediens-ervaring te skep waarin ‘n egte ontmoeting met God en mekaar kan gebeur.
  • Dit skep ‘n Familie-vriendelike toepassing vir die erediens.
  • Die projek word steeds met die heelhartige ondersteuning van Bybel-Media moontlik gemaak.
  • Daarom kan ons die PowerPoints en Word-lêers steeds gratis beskikbaar stel.

Meer inligting

File Version Licence Size Added Hits

Johannes 18:33-37 – Ses en Twintigste Sondag in Koninkrykstyd – Sondag van Christus die Koning – 22 November 2015

Johannes18 33-37Sluit by die kerkjaar aan met ‘n skildery van Jesus voor Pilatus en gesels met die kinders oor koningskap. Jy kan klem lê op die verskil tussen ‘n goue speelgoed kroon en ‘n doringkroon. Jesus het die doringkroon gekies. Jy kan ook aansluit by die storie – met video – van die Sewe Blinde Muise deur Ed Young wat ‘n vreemde nuwe ding by die muise se watergat moet verwerk. Die preekriglyn fokus op die koningskap van Jesus, en die betekenis daarvan vir ons lewe. Die Joodse leiers se diepste vrees en afsku is Jesus se afwysende houding teenoor die tempel en die Jode se godsdienstige gebruike. Daarmee is die godsdienstige leiers se houvas op die tempel in gevaar. Vir hulle is Jesus se optrede moeilikheid en gevaar. Vandag sal ons sê Jesus se hutsmerke (hash tags) staan hulle nie aan nie: #TempleMustFall, #RomeMustFall, #OneTrueKing, #KingdomOfGod. Uit sy gesprek met Pilatus blyk duidelik dat Jesus, die Koning, sy gesag nié van die aarde kry nie. Sy gesag is wel vir die aarde, want Hy leer sy dissipels om te bid dat God se koninkryk op die aarde sal kom.

Johannes 18:33-37.ppt 785.5 KB Nov 15, 2015 05:50 Download 790
Johannes 18:33-37.pptx 760.99 KB Nov 15, 2015 05:49 Download 670
Johannes 18:33-37.doc 112 KB Nov 15, 2015 05:48 Download 877

Markus 13:1-8 – Vyf en Twintigste Sondag in Koninkrykstyd – 15 November 2015

Markus13 1-8aOmdat hierdie ‘n moeilike gedeelte vir kleiner kinders is om te verstaan, kan jy die teks in ‘n eenvoudiger vertaling lees. Daar is ook ‘n inkleurprent wat jy kan gebruik. Die preekriglyn werk met die verhaal van Dave Boon wat met sy motor deur ‘n sneeustorting meegesleur is, maar weens sy opleiding en ervaring as skiër die noue ontkoming kon oorleef. In ons teks gaan Jesus van die tempel af weg. Dit is sterk taal, want veel meer sê as maar net dat Jesus fisies weggestap het. Dit simboliseer Jesus se finale en beslissende breuk met die tempel. Praat van waarskuwings. Die tempel met al sy mag en weelde verloor sy rol as konneksiepunt tussen God en mens. Jesus self word nou die weg tot die Vader. Jesus is dus hier gesagvol besig om God te verteenwoordig. Hy neem posisie in regoor, teenoor die tempel. Jesus leer die dissipels om nie deur tekens mislei te word nie. Die eintlike vraag is of die dissipels hulle steeds aan Jesus se leer en voorbeeld sal bly steur wanneer die tempel val en die voleinding van die wêreld nader kom. Naas die gevaar van misleiding, is daar ook die tekenmag van angs en vervreemding wat vyandskap, oorloë, aardbewings en hongersnode sal bring. Jesus herinner hulle eter daaraan dat die tekens van die tye daar is om hulle te anker in getrouheid, versigtigheid, waaksaamheid en gehoorsaamheid in die hede. Dwarsdeur al die tye moet die herhalende tekens ons aandag op Jesus fokus. Dit is egter nie sterwenspyne nie: dit is geboortepyne, die begin van die nuwe tyd.

Markus 13:1-8.ppt 1.07 MB Nov 01, 2015 15:20 Download 794
Markus 13:1-8.pptx 1.01 MB Nov 01, 2015 15:19 Download 692
Markus 13:1-8.doc 136.5 KB Nov 01, 2015 15:18 Download 837

Markus 12:38-44 – Vier en Twintigste Sondag in Koninkrykstyd – 8 November 2015

Markus12 38-44Met enige Familietyd kan jy in gedagte hou dat jy nie altyd morele “lessies” uit die teks hoef te haal nie. Veral die narratiewe tekste kan gewoon dramaties gelees of oorvertel word. Daar is drie opsies om dit interessant te doen, onder andere met ‘n video. Jy kan ook vir ‘n paar kinders 10c-muntstukke gee. Gee vir sommige twee, vir ander meer. Vra dan vir almal om twee 10c-stukke in die kollektebord te gooi. Die met net twee, moet alles gee. Die met tien, gee minder. Dit is ‘n maklike manier om te verduidelik wat in vandag se verhaal gebeur. Die preekriglyn werk met die verhaal van Fulvia, ‘n Romeinse vrou, wie se besluit om ‘n Joodse gelowige te word wat daartoe gelei het dat Tiberius alle Jode in 19 n.C. uit Rome verban. Hierdie magsvergryp van Tiberius was groot nuus in die Romeinse Ryk, en ook in die Israel van Jesus se tyd. In ons teksgedeelte waarsku Jesus die mense teen ‘n soortgelyke misbruik van mag. Die skrifgeleerdes se vrae getuig boonop van die godsdienstige owerhede se onmag om God se werk in Jesus, en Jesus se gesag as gestuurde van die Vader te herken en te erken. Daarteenoor – in skrille kontras – sien ‘n mens die “egte” gawe van die arm weduwee, teenoor die byna onuitstaanbare vertoon en skyn van vroomheid van die skrifgeleerdes en die welvarende mense rondom haar. Dit is nie haar armoede wat Jesus verheerlik nie. Dit is ook nie rykdom wat Hy afskiet nie. Dit is egte geloof en toewyding aan God wat vir Hom die verskil maak. Die waarde van die offer lê nie in die bedrag nie, maar in die koste vir die persoon wat dit gee.

Markus 12:38-44.ppt 956 KB Oct 25, 2015 19:49 Download 817
Markus 12:38-44.pptx 900.85 KB Oct 25, 2015 19:48 Download 697
Markus 12:38-44.doc 101 KB Oct 25, 2015 19:47 Download 901

Markus 12:28-34 – Drie en Twintigste Sondag in Koninkrykstyd – Seisoen van die Voleinding – 1 November 2015

Markus12 28-34Soos gewoonlik kan jy in Familietyd ‘n eenvoudiger teks gebruik, bv. uit Die Nuwe Testament vir Kinders, om oor die tema van die liefde wat die heel belangrikste is met die kinders te kan gesels. Daar is ook die oulike idee van Carolyn Brown om met karton te werk waarop aan elke kant die 2 kante van die wet neergeskryf word. Dit kan dan met tou aan ‘n prominente deurknop in die huis gehang word. Die preekriglyn werk met die verhaal van die Joodse psigiater Viktor Frankl wat tydens die Tweede Wêreldoorlog in Auschwitz geplaas is. Hy is van alles gestroop, ook die manuskrip van 'n boek wat sy jarelange navorsing bevat het oor hoe om sin en betekenis in die lewe te vind. In ruil daarvoor het hy die vodde gekry van 'n prisonier wat na die gaskamer gestuur is. In die sak van hierdie “nuwe” jas het hy 'n enkele bladsy gevind wat die Joodse gebed "Shema Jisrael" (Luister, Israel) bevat. Dit het Frankl diep geraak. Die verslete bladsy het hom uitgedaag om sy navorsing oor die sin van die lewe prakties uit te leef. Frankl het die strafkamp oorleef en later 'n baie invloedryke boek geskryf, Man's Search for Meaning. Hy sê: "Hy wat 'n doel het om voor te lewe, 'n 'waarom', kan omtrent enige omstandighede oorkom." Die antwoord van Jesus oor die heel grootste gebod vervul dieselfde funksie in ons lewe, veral omdat dit aansluit by die Shema, maar dit dan ook op ‘n betekenisvolle wyse uitbrei deur Levitikus 19:18 by die eerste gebod om God lief te hê, te voeg: “'Jy moet jou naaste liefhê soos jouself.” Geen ander gebod is groter as dié twee nie.

Markus 12:28-34.ppt 1.64 MB Oct 25, 2015 13:21 Download 823
Markus 12:28-34.pptx 1.53 MB Oct 25, 2015 13:19 Download 682
Markus 12:28-34.doc 133.5 KB Oct 25, 2015 13:18 Download 801

Job 42:1-6, 10-17 - Twee en Twintigste Sondag in Koninkrykstyd (Hervormingsondag) - 25 Oktober 2015

Job42 1-6 10-17Om aan te sluit by die Hervorming is daar ‘n kort “toneelstuk” wat jy kan gebruik met Maartin Luther, die keiser en twee ontvoerders as akteurs. Die uitkoms van dié toneelstuk is Maartin se vertaling van die NT in Duits en die begin van die Hervorming. Die preekriglyn val weg met die intense worsteling van Job, en sy pogings om sin van sy lyding te maak wat in Job 42 tot 'n einde kom. Job se woorde is min wanneer hy die Here in hfs. 42 antwoord. Dis vreemd vir iemand wat vroeër so baie gepraat het. Dit bewys egter alreeds dat die Here Job tot nuwe insig gebring het. Die Here het Job se regsaak gewen. Daar kom egter 'n nuwe, persoonlike band tussen Job en God tot stand. In hierdie persoonlike verhouding vind Job vrede, selfs al sit hy steeds op die ashoop van sy lyding. God is genoeg, selfs voor sy lot aan die einde van die verhaal verander.

Job 42:1-6,10-17.ppt 759 KB Oct 02, 2015 17:42 Download 738
Job 42:1-6,10-17.pptx 674.82 KB Oct 02, 2015 17:41 Download 699
Job 42:1-6,10-17.doc 120.5 KB Oct 02, 2015 17:40 Download 1083

Job 38:1-7, (34-41) - Een en Twintigste Sondag in Koninkrykstyd - 18 Oktober 2015

Job38 1-7Sluit met Familietyd aan by die tema in die Verootmoediging deel van die liturgie om by Job se worsteling aan te sluit. Deel Job se antwoord met die kinders aan die hand van Job 42 en eindig met sy besluit om sy lewe in God se hande te laat. Die preekriglyn begin met ‘n bespreking van die sterkte van die vier basiese natuurkragte wat die fyn balanse in die skepping illustreer: swaartekrag, “swak” en “sterk” kernkragte en elektromagnetiese kragte. Indien slegs een van hierdie kragte 'n klein bietjie swakker of sterker was, sou die lewegewende wêreld, soos ons dit ken, onmoontlik wees. In ons teks gaan God juis met Job in gesprek oor die wonder van die werklikheid. Op 'n vreemde manier help dit Job om vrede te vind.

Job 38:1-7.pptx 729 KB Oct 01, 2015 17:50 Download 741
Job 38:1-7.pptx 630.17 KB Oct 01, 2015 17:49 Download 734
Job 38:1-7.doc 120 KB Oct 01, 2015 17:48 Download 843

Job 23:1-9, 16-17 - Twintigste Sondag in Koninkrykstyd - 11 Oktober 2015

Job23 1-9 16-17Vir Familietyd kan jy Carolyn Brown se voorstel gebruik om die kinders in ‘n klaaggebed te begelei of die pragtige “The Lonely Book” deur Kate Bernheimer vir die kinders lees wat nes Job groot vreugde en erge lyding – geliefd tot vergete - beleef. Die storie maak dit vir kinders makliker om te gesels oor gevoelens van eensaamheid en moedeloosheid. Daar is ook ‘n video beskikbaar. Die preekriglyn begin met die verhaal van Guernica, 'n Baskiese dorpie in die noordooste van Spanje wat in 1937 op versoek van die Spaanse diktator, generaal Franco, deur Duitse en Italiaanse bomwerpers aangeval en verwoes is. Aan die hand van die muurgrootte olieverfskildery (skakel in preekriglyn) deur die Spaanse kunstenaar, Pablo Picasso, waarmee hy protes aanteken teen daardie sinnelose geweld, onder andere deur verskeie kruisigingsmetafore in die skildery te gebruik, word die gemeente begelei om oor lyding te dink. Daar is ook ‘n gedig van Neels Jackson daaroor wat jy kan gebruik. Beide as verwoeste dorpie en as Christelike olieverf-interpretasie van die ontsettende lyding is Guernica 'n teken van die ontsettende swaarkry wat mense ervaar. Dit is 'n kreet ten hemele om God se bystand en vertroostende teenwoordigheid. Dit gee ‘n uitstekende inleiding om stil te staan by Job se worsteling en krete om God te vind, en sin te beleef te midde van die verskriklike verlies. Die boek Job is soos 'n Ou Testamentiese Guernica-skildery wat sin wil, maak van die geheimenis van God, en van die oënskynlike afwesigheid van God in die diepste menslike ellende. Die boek roep soos Psalm 22 en Christus aan die kruis: "My God, my God, waarom het U my verlaat?" Te midde van hierdie intense verlies toets en weeg dit die fondamente en sekerhede waarop mens jou lewe bou.

Job 23:1-9,16-17.ppt 737.5 KB Oct 01, 2015 17:24 Download 771
Job 23:1-9,16-17.pptx 695.29 KB Oct 01, 2015 17:23 Download 767
Job 23:1-9,16-17.doc 142 KB Oct 01, 2015 17:22 Download 829

Job 1:1; 2:1-10 - Negentiende Sondag in Koninkrykstyd - 4 Oktober 2015

In die Jobreeks vir die volgende vier weke kry ons die geleentheid om ons weer in te leef in die ryk storiewêreld wat geskep word deur die meesterverteller van die Jobverhaal. Die kompleksiteit van Job se belewing van verlies en teëspoed, sy pynlike argumente met geliefdes, sy vrae aan God en sy emosionele inkeer is alles bekende elemente aan die menslike drama en daarom so toeganklik vir moderne lesers. Die vier Sondae dien as bakens op Job se reis en staan stil by Job se belewing van verlies, sy soeke na antwoorde en sin, God se antwoord en die openbaring van sy almag en Job se emosionele inkeer. Die laaste Sondag in die reeks val saam met Hervormingsondag en Job se emosionele inkeer kan goed aangewend word om die gesindheid van die proses van "hervorming" te illustreer.

Job1 1 2 1-10Vir Familietyd kan jy fokus op die eerste Sondag op die doodgewone vertel van die verhaal van Job. Daar is ’n voorbeeld van só ’n vertelling ingesluit plus ’n inkleurprent. Dit preekriglyn sluit aan by twee verhale van verlies, dié van ’n regter, Joan Lefkow, wie se moeder en eggenoot in ‘n wraakaanval in Chicago doodgeskiet is, en dié van Chris Gouws, voormalige skoolhoof op Ugie wie se vrou, Helena, in 2012 in 'n rooftog gedood is. 'n Paar weke gelede is ook sy broer en moeder, Ruben en Hermien, in 'n rooftog vermoor. Hoewel baie verliese nie so dramaties is nie, is alle verliese so werklik en ingrypend. Wat maak ons as Christene met hierdie soort situasies? Hoe bring ons ons geloof in God en intense lyding bymekaar uit? Ligte, maklike antwoorde werk nie. Die boek Job is 'n uitnodiging – soos sal blyk ons die boek oor die volgende weke voor ons ontvou – om die diepte, misterie en lewende teenwoordigheid van God te ontdek. Juis deur sy verliese en pyn leer Job God op 'n veel dieper manier ken. Wat hom dra, is die lewende verhouding met God waarop hy nie kan teruggaan, en dit verwerp nie. Mag die Here ons genade gee om regtig soos regter Joan Lefkow te bly sê: "As 'n reisiger hier op aarde, voel ek nie ek kan aanspraak maak op baie nie. Ek glo regtig die Here gee en die Here neem. Dit is jou verantwoordelikheid om die teenspoed te aanvaar, net soveel soos jy graag die voorspoed aanvaar." Agter hierdie berusting sit 'n die geloof en innige blik op wie God is.

Job 1:1,2:1-10.ppt 1.34 MB Sep 29, 2015 05:22 Download 783
Job 1:1,2:1-10.pptx 1.27 MB Sep 29, 2015 05:19 Download 695
Job 1:1,2:1-10.doc 372.5 KB Sep 29, 2015 05:18 Download 795

Jakobus 5:13-20 - Agtiende Sondag in Koninkrykstyd - 27 September 2015

Jakobus5 13-20Jy kan in Familietyd ‘n beker koffie gebruik as simbool van gebed. Mens kan dit mos nie dadelik drink nie, al ruik dit heerlik. Jy moet eers wag dat dit koud word. Of gebruik die simboliek van ‘n saadjie wat geplant is, maar nie dadelik opkom nie. Sluit aan by rustig en geduldig te wag by die Here. Jy kan ook Carolyn Brown se idee van ‘n gebed-blad vir elke kind gebruik. Die preekriglyn val weg met ‘n aanhaling van Helmut Thielicke, die Duitse teoloog, uit sy lesings oor die Ons Vader-gebed, dat ons almal skuld het voor God en nodig het om voor hom ons skuld te bely. Dit is wat Jakobus ook doen. Hy spel gelowiges se verantwoordelik ten opsigte van skuld uit; teenoor mekaar, die gemeente en teenoor God. Hierdie skuld bring letterlik siekte oor individue en die gemeente. Daarom moet man en muis almal intree in gebed voor God. Die Heler van ons skuld en ons siekte.

Jakobus 5:13-20.ppt 1.23 MB Sep 21, 2015 09:17 Download 713
Jakobus 5:13-20.pptx 863.67 KB Sep 21, 2015 09:16 Download 660
Jakobus 5:13-20.doc 116 KB Sep 21, 2015 09:15 Download 854

Jakobus 3:13-4:3, 7-8a - Sewentiende Sondag in Koninkrykstyd - 20 September 2015

Jakobus3 13-4 3 7-8aLees Jakobus 4 uit Die Nuwe Testament vir Kinders of gebruik die storie van Jannie en Dirkie om die moeilike begrip van jaloesie te verduidelik. Jannie het vir sy agste verjaardag ‘n fiets gekry en dit is waar Dirkie toe baie jaloers word ... Dit is waaroor vandag se Bybelteks gaan geïllustreer in die preekriglyn deur 'n predikant wat eendag 'n oorweldigende belewenis van God se heiligheid in die kerk ervaar en só ook sy medeleraar en ‘n paar ander personeellede. Elkeen sê: "O Here, ek is niks nie!" Totdat die skoonmaker dit ook doen, waarop die een dominee vir sy kollega sê: "Wel, kyk wie matig hom darem vreeslik aan. Hy dink hy is ook niks voor die Here nie!" In ons teksgedeelte beklemtoon Jakobus dat die toestand van ons binnekant, ons hart, bepalend is vir hoe ons lewe na buite lyk. Waar daar bittere naywer en selfsug in ons harte is, daar verhef die een hom bo die ander. Aan die ander kant: waar God se wysheid mense aanraak, is daar nederigheid, geen bybedoelings nie en opregtheid. Ons binnekant is belangriker as wat ons dink. Innerlike genesing, deur die wysheid wat God gee, is meer nodig as wat ons dikwels besef.

Jakobus 3:13-4:3, 7-8a.ppt 1.02 MB Sep 15, 2015 05:33 Download 730
Jakobus 3:13-4:3, 7-8a.pptx 980.13 KB Sep 15, 2015 05:31 Download 638
Jakobus 3:13-4:3, 7-8a.doc 113.5 KB Sep 15, 2015 05:31 Download 927

Jakobus 3:1-12 - Sestiende Sondag in Koninkrykstyd - 13 September 2015


Jakobus3 1-12Jakobus praat oor klein goed wat ‘n groot impak kan hê (stang, roer, tong) – ‘n boodskap wat natuurlik vir kinders heerlik is om te hoor! Julle kan lekker saam gesels oor hoe die kinders ‘n positiewe impak kan maak, veral deur hul woorde. Jy kan ook die pragtige storie van “Willow” lees waarvan ons ‘n kort opsomming plaas. Die preekriglyn begin met die verhaal van ie verwoestende veldbrande in die Kaapse Skiereiland gedurende die eerste week van Maart 2015. Dit het Jakobus se beeld van 'n klein vuurtjie wat 'n groot bos aan die brand kan steek geïllustreer. Woorde het ‘n soortgelyke krag. Omdat dit so 'n algemeen menslike verskynsel is, kan ons maklik nou maar dink "so what", almal maak foute, dit is nie so belangrik nie, dit is iets kleins en onbeduidends, almal struikel hieroor, dit is nie so erg nie. Hier kom Jakobus se wekroep: Dit is nie so onbelangrik soos wat jy dink nie! Dit wat jy sê het 'n magtige uitwerking! Dit het 'n groot effek, 'n groot invloed, groot gevolge. Die preekriglyn sluit af met die verhaal van die dogtertjie wat alleen in haar kamer in die donker lê, en vra dat haar oppasser met haar gesels. Sê die kind, “As jy met my praat, word dit lig.” Jakobus sê ons moet kies. Ons kan nie albei doen en lig en donker bring nie. So, maak jou keuse vandag en hou daarby. En onthou, Iemand sal jou help.

Jakobus 3:1-12.ppt 1.1 MB Sep 06, 2015 18:34 Download 930
Jakobus 3:1-12.pptx 867.13 KB Sep 06, 2015 18:30 Download 662
Jakobus 3:1-12.doc 97 KB Sep 06, 2015 18:29 Download 934

Jakobus 2:1-10, (11-13), 14-17 - Vyftiende Sondag in Koninkrykstyd - 6 September 2015

Jakobus2 1-10 14-17Daar is ’n Peanuts – strokie wat presies by vanoggend se teks aansluit. Dit sal jou ook help om die kinders van die barmhartigheidsbedieninge waarby jul gemeente betrokke is, te vertel, en die kinders daarby te betrek. Daar is ook ‘n innemende verhaal van Nasrettin Hoco, ‘n wyse man uit die verhaal The Hungry Coat: A Tale from Turkey. Die preekriglyn begin met die verhaal van David Sharp wie se suurstof opgeraak het ná hy Everest se hoogste piek bereik het en op pad terug was. Niemand wat by hom verby geklim het, wou hom help nie. David het verkluim terwy 40 mense by hom verbygeklim het. Die verhaal laat mens besef dat wat jy sien, wanneer jy kyk, lewensgevaarlik kan wees. As jy na 'n sterwende op Everest kyk en 'n hindernis vir jou eie doelwitte sien, veroorsaak dit die dood. Ons teks is dus só aktueel. Ons moet versigtig wees om mense op die uiterlike te beoordeel. Die gevaar van uiterlike beoordeling is enersyds dat ons verkeerd kan oordeel. Die verdere gevaar is dat ons beoordeel sonder empatie en meelewing. Eerder as om met vrygewigheid te help, bly ons harte toegesluit.

Jakobus 2:1-10,14-17.ppt 1.14 MB Aug 30, 2015 21:10 Download 728
Jakobus 2:1-10,14-17.pptx 1.05 MB Aug 30, 2015 21:08 Download 657
Jakobus 2:1-10,14-17.doc 104 KB Aug 30, 2015 21:08 Download 821

Jakobus 1:17-27 - Veertiende Sondag in Koninkrykstyd (Barmhartigheidsondag) - 30 Augustus 2015

Jakobus1 17-27Die groot uitdaging gaan hierdie week wees om nie moraliserend met die kinders te praat nie. Jy kan (versigtig) aansluit by die idee van hoor én doen. Voorbeelde soos: jy weet jy mag nie oor die straat hardloop nie – en dan gaan speel jy bal in die straat. Wanneer ons Jesus se kinders is, hoor ons na wat God sê – én ons doen wat hy sê. Daar is ook ‘n voorstel rondom die gebruik van ‘n resepteboek. As julle aktiwiteite doen, kan julle “oor-alicebands” maak van papierbord. Die preekriglyn begin met die verhaal van Tony Campolo, bekende Amerikaanse spreker, wat op 'n dag tydens 'n erediens vir 'n man met ernstige kanker gebid. 'n Paar dae later kry hy 'n oproep van die man se vrou. Sy sê: "Jy het vir my man gebid. Hy het kanker gehad." Waarop Tony sê: "Hét gehad?" By homself het hy gedink: "Sjoe, dit het gebeur! Die man is genees!" Die vrou sê: "Ja, hy het kanker gehad. Hy is oorlede." Campolo het verskriklik sleg gevoel. "Moenie sleg voel nie," het die vrou gesê. "Toe my man verlede Sondag kerk toe is, was hy vol woede. Hy het besef hy gaan oor 'n kort rukkie sterf, en hy het God daarvoor gehaat. Nadat jy vir hom gebid het, het daar vrede oor hom gekom en hy is met diepe vreugde vervul. Die laaste drie dae was die beste dae van ons lewe. Ons het gesing. Ons het gelag. Ons het saam Bybel gelees. Ons het gebid. Dit was regtig wonderlike dae. Daarom bel ek nou, om dankie te sê dat jy jou hande op my man gelê en vir hom gebid het. Sy siekte is nie weggeneem nie, maar hy is innerlik genees." Ons teks is ook vol van die krag van God. Jakobus praat oor die woord van God en die woorde van mense as instrumente van lewe. God gee sy woord van waarheid wat lewe skep, mense red, mense laat groei, mense op die regte pad lei. Jakobus daag ons uit om God se woord in ons te laat groei, sodat ons eie woorde ook lewe kan bring en ons op die regte lewenspad plaas.

Jakobus 1:17-27.ppt 1.22 MB Aug 25, 2015 07:44 Download 756
Jakobus 1:17-27.pptx 1.1 MB Aug 25, 2015 07:42 Download 687
Jakobus 1:17-27.doc 173.5 KB Aug 25, 2015 07:42 Download 916

Johannes 6:56-69 – Dertiende Sondag in Koninkrykstyd – 23 Augustus 2015

Johannes6 56-69As jy dit nog nie gedoen het nie, kan jy die “brood van die lewe” beeld uitpak. Johannes sê om Jesus se ken is die brood wat die lewe die moeite werd maak. Jy kan ook “flashcards” gebruik om te illustreer hoe ‘n mens leer lees. Gesels oor hoe ons soms sukkel om aan te hou om Jesus te volg, maar dan raak dit moeilik. Verwys dan na die dissipels wat gesê het Jesus se woorde is vir hulle lewe. Sluit weer aan by die “flashcards” en moedig almal aan om te volhard. Die preekriglyn begin by die redes waarom baie mense Jesus verlaat het en selfs teen Hom gedraai het. Die keerpunt was die aansprake wat Jesus oor Homself gemaak het. Hy is die Seun van God wie se vlees geëet en bloed gedrink moes word om die ewige lewe te verkry. Dit was te erg vir die meeste van die volgelinge. Dit was "harde woorde" wat onaanvaarbaar en onuitvoerbaar was. Die eintlike grond vir hulle weggaan, was nie Jesus se eise nie, maar die ongeloof in hulle harte dat Jesus werklik die Here is. Jesus se woorde kom van die Gees en gee lewe. Tog het dit nie dieselfde uitwerking op alle mense nie. Die mens kan niks bydra tot die ewige lewe nie. Tog moet ons na Jesus "kom"; Jesus in geloof aanneem. Ons word genooi om te kies vir die "eet" en die "drink" van Jesus se gawe aan ons. Petrus se antwoord kan ons ook toeëien: Ons het niemand anders om heen te gaan nie. As soekers na lewe, weet ons daar is net Jesus, die Heilige wat van die Vader kom en deur sy Woord en Gees die hoop is op wie ons kan bou. Jesus het die woorde wat die ewige lewe gee. Die volheid en oorvloed van lewe is alleen by Hom te vind. Ons antwoord op Jesus se woord bepaal die sin van ons lewe: nou en ook na die dood. Jesus het immers die woorde wat lewe gee. Jesus is die Brood van die lewe.

Johannes 6:56-69.ppt 1.56 MB Aug 18, 2015 15:18 Download 772
Johannes 6:56-69.pptx 1.07 MB Aug 18, 2015 15:16 Download 600
Johannes 6:56-69.doc 114 KB Aug 18, 2015 15:15 Download 688

Johannes 6:51-58 – Twaalfde Sondag in Koninkrykstyd – 16 Augustus 2015

Johannes6 51-58As jy dit betyds in die hande kan kry, kan jy die storie Sun Bread deur Elisa Kleven lees. Tydens die kouer, triestige, donker dae van winter bak ‘n bakster ‘n brood wat mense herinner aan die son. Terwyl hulle die brood eet, word hulle gevul met die son se lig en warmte. Net so word ons deur Jesus, die Brood van die Lewe, gevul deur lig en lewe. Kinders kan dalk nog nie die presiese lyn trek nie, maar hulle kan moontlik aan Nagmaalsbrood as sonbrood begin dink – brood wat God se lig deel. Jy kan ook aansluit by die gesegde (in die preek) “jy is wat jy eet”. Of wys ’n prent van die outydse kos-piramide en verduidelik die beginsel daaragter. Op dieselfde manier is Jesus die fondament van ons lewe. Dit gee ‘n goeie oorgang na die preekriglyn. Jesus neem 'n seuntjie se vyf garsbrode en twee vissies en voed daarmee 'n hele skare. Na aanleiding van die broodwonder soek mense die volgende dag na Jesus. Jesus sê egter hulle soek Hom nie omdat hulle wondertekens gesien het nie, maar omdat hulle nog brood wil hê om te eet. Jesus fokus dus hulle aandag op die voedsel wat die ewige lewe gee: daarna moet hulle soek. Wat God van hulle verlang, is om te glo in Hom wat God gestuur het.

Johannes 6:51-58.ppt 1.35 MB Aug 11, 2015 11:26 Download 631
Johannes 6:51-58.pptx 1.28 MB Aug 11, 2015 11:25 Download 580
Johannes 6:51-58.doc 90.5 KB Aug 11, 2015 11:24 Download 783

2 Samuel 18:5-9, 15, 31-33 – Elfde Sondag in Koninkrykstyd – 9 Augustus 2015

2Samuel18 5-9 15 31-33Carolyn Brown meen dat tov 2 Samuel 18 volwassenes oor die algemeen oorweldig word deur Dawid se hartseer en rou oor die dood van sy opstandige seun Absalom. Nie so met kinders nie- hulle is eerder gefassineer met Absalom se hare wat in die boom vassit! Gebruik gerus die ingeslote blokraaisel ahv Die Boodskap se weergawe van die fokusteks. Die preekriglyn begin met ‘n inset oor die hoofberigte op koerante se voorblaaie wat ons elke dag lees. Nieteenstaande die belang van elke berig is die insidente natuurlik ‘n paar dae later vergete. Nie omdat dit nie sensasioneel is nie. Daar is net soveel nuwe voorvalle elke dag! Ons teks is egter nie 'n maklike teks om oor na te dink nie. Dit begin sleg en dit eindig nog slegter. Dis asof die leser daarvan in 'n wrede verhaal inklim om nie weer uit die afskuwelikhede te kan uitkom nie. Dis die verhaal van 'n seun wat teen sy pa in opstand kom. Hy inisieer 'n oorlog wat skeefloop en hom sy eie lewe kos. Dit laat die pa gebroke. Hy wens sy lewe eerder as dié van sy seun kon in die slag gebly het. Die hartseer is dat alles wat hier gebeur, en wat dit voorafgegaan het, deel is van die samelewing waarbinne ons vandag leef. Ironies genoeg is ons Leesroosterteks vir vandag – op Nasionale Vrouedag – 'n teks waarin soveel geweld die botoon voor. En soos ons sal sien, herinner ons teks aan die verskriklike werklikheid waarmee soveel vroue in ons land elke dag moet saamleef. Die manier waarop Absalom sterf is vanuit 'n Nuwe-Testamentiese perspektief ook opvallend. later sou daar weer 'n man wees wat hang aan 'n boom, tussen hemel en aarde. Nie omdat sy muil onder Hom uitgery het nie, maar omdat mense Hom daaraan gekruisig het. En Hy sterf ter wille van die liefdeloosheid van die hele mensdom, ter wille van die wrede vergrype van mense teenoor mekaar. Die kerk het die gesag van God ontvang om versoening te bedien. Ons is geroep om God se liefde en geregtigheid na te jaag. Binne elke gemeente moet 'n gesprek op leiersvlak ontstaan oor wat ons hieraan gaan doen. Die siklus van geweld moet gebreek word. Mense moet die geleentheid kry om hul potensiaal te verwesenlik. As dit nie veilig is vir die swakste onder ons nie, is dit vir niemand veilig nie. Jesus het ons sy Woord en Gees gegee om van die wêreld 'n veiliger, meer betroubare plek te maak.

2 Samuel 18:5-9,15,31-33.pptx 1.27 MB Aug 04, 2015 08:12 Download 657
2 Samuel 18:5-9,15,31-33.pptx 1.13 MB Aug 04, 2015 08:10 Download 586
2 Samuel 18:5-9,15,31-33.doc 173.5 KB Aug 04, 2015 08:09 Download 715

2 Samuel 11:26-12:13a – Tiende Sondag in Koninkrykstyd – 2 Augustus 2015

2Samuel11 26-12-13aLees weer die geredigeerde weergawe van Die Boodskap oor die fokustuks dramaties vir die kinders. Daar is ook ‘n inkleurprent van Koning Dawid en Batseba met die babaseuntjie beskikbaar. Die preekriglyn werk met die verhaal van John McCain, die Republikeinse presidentskandidaat in 2008 wat teen Barack Obama verloor het. McCain is gedurende die Viëtnam-oorlog ernstig beseer en gevange geneem. Hy was tot 1973 'n krygsgevangene, en is in hierdie tyd gemartel. Sy oorlogswonde het hom met lewenslange fisieke beperkinge gelaat. McCain sien moed, dapperheid en durf as belangrike elemente van leierskap, trouens van die lewe self. Hy skryf by geleentheid: “Moed en durf is soos 'n spier. Hoe meer ons die spier van moed oefen, hoe sterker word dit. Ek is soms bekommerd dat ons gemeenskaplike moed swakker en swakker word weens 'n gebrek aan oefening. Ons vereis nie moed van ons leiers nie, en ons leiers dring weer nie by ons aan om durf aan die dag te lê nie. Die tekort aan moed is beide ons probleem en ons skuld. Gevolglik het te veel leiers in die publieke en private sektor glad nie die moed om hulle beloftes na te kom nie. Daar is ook te min moed om die wesenlike waardes van leierskap te handhaaf.” Dit gee ‘n goeie inleiding om die verhaal van Natan se moedige aanspreek van koning Dawid, “speaking truth to power.” Natan se optrede is 'n goeie voorbeeld van die spreek van God se waarheid teenoor diegene in gesagsposisies. Gesag en invloed het maniere om die waarheid te begin verdoesel en draai. Daarom is dit so belangrik om waarheid aan mag te bedien. Ons sien ook dat Batseba moed aan die dag lê om vir lewe, wysheid en vir haar seun, Salomo, te kies. Uiteindelik het ook Dawid die moed om sy skuld te bely en die slagoffer van sy misbruik te versorg. Die toepassing is duidelik: Hoe meer ons die onreg rondom ons raaksien, hoe meer daag ons teks ons uit om God raak te sien, en volgens God se waarheid te bly leef. Die vraag bly dus: Hoeveel moed het ons vandag?

2 Samuel 11:26-12-13a.ppt 1.08 MB Jul 27, 2015 18:32 Download 727
2 Samuel 11:26-12-13a.pptx 819.07 KB Jul 27, 2015 18:31 Download 585
2 Samuel 11:26-12-13a.doc 130.5 KB Jul 27, 2015 18:30 Download 781

2 Samuel 11:1-15 – Negende Sondag in Koninkrykstyd – 26 Julie 2015

2Samuel11 1-15Vir Familietyd kan jy die aangepaste weergawe van Die Boodskap dramaties voorlees. Beklemtoon vir die kinders die feit dat Dawid ‘n ander man se vrou gesteel het. Wat sy sonde erger maak is dat hy dit probeer toesmeer het. Selfs die magtige koning Dawid moes egter God se reëls gehoorsaam. Dieselfde vir ons. Die preekriglyn werk met die stryd van die bekende Christen-outeur, Philip Yancey, om sy geloof te herwin in sy boek Soul Survivor. Hy vertel daarin van dertien sleutelpersone wat hom op sy geestelike reis en pad van geloof gehelp het. Yancey is nie net eerlik oor sy eie worstelinge en gebreke nie. Hy skroom ook nie om die gebreke en leemtes van sy mentors uit te wys nie. Dit is net so ontstellend soos ons teks van vandag. Hoe is dit moontlik dat koning Dawid so kon sondig, knoei en selfs moord pleeg om uit die moeilikheid te kom? Die verhaal van Dawid leer ons egter dat as ons nie eerlik oor ons sonde kan praat nie, gaan ons dit ook nooit oorwin nie. Daar is hoop vir mense wat hulle eie sonde in die oë kan kyk, dit kan herken en erken, berou daaroor kan hê en hulle lewe verander. Dawid het dit gedoen. Daar is hoop – ook vir sondaars soos ons.

2 Samuel 11:1-15.ppt 1.27 MB Jul 21, 2015 13:41 Download 848
2 Samuel 11:1-15.pptx 798.51 KB Jul 21, 2015 13:39 Download 546
2 Samuel 11:1-15.doc 118.5 KB Jul 21, 2015 13:37 Download 724

2 Samuel 7:1-14a – Agste Sondag in Koninkrykstyd – 19 Julie 2015

2Samuel7 1-14aKleiner kinders word groot met die gedagte dat die kerk die huis van God is waar Hy woon. Omdat hulle denke letterlik van aard is, kan hulle wonder of God dan nie eensaam word in die week wanneer daar niks in die kerk gebeur nie. Hulle sou ook kon wonder hoe dit werk dat God nie net in een kerk woon nie, maar in al die kerke teenwoordig is. Vertoon nou foto’s van verskeie kerke van regoor die wêreld in ‘n PowerPoint vir kinders (laai dit hier af). Gesels oor watter verskille en watter ooreenkomste daar bestaan. Dan kan die verhaal van Dawid en sy behoefte om vir God ‘n huis te bou, vertel word, en die idee dat die kerk net ‘n gebou is waar die alomteenwoordige God aanbid word, verduidelik word. Die preekriglyn begin met die storie van Olifant en Reën wat wou trou (wat ook vir kindertyd gebruik kan word). Maar die wittebrood is skaars verby of die twee groot ego's begin bots. Almal moet dit ontgeld in die oorlog tussen hulle. Selfs Reën se uiteindelike toenadering slaag nie om dié geveg te ontlont nie, met tragiese gevolge vir Olifant. Dié storie verskaf ‘n gladde oorgang om te gesels oor die verskriklike gevolge wanneer magtige mense koers verloor, hul oordeelsvermoë in die slag bly, magsbeheptheid oorneem en kleinlike twiste daartoe lei dat alles rondom hulle verwoes word. Dit lei letterlik daartoe dat die hele omgewing swaar kry en die land tot niet gaan. Paslike leierskap is daarom leierskap wat met God rekening hou en God se wil vir 'n betroubare, regverdige samelewing doen, soos Dawid hier illustreer.

2 Samuel 7:1-14.ppt 1.35 MB Jun 27, 2015 11:29 Download 770
2 Samuel 7:1-14.pptx 994.51 KB Jun 27, 2015 11:26 Download 589
2 Samuel 7:1-14.doc 126.5 KB Jun 27, 2015 11:26 Download 799
Kerke van die wêreld.ppt 3.27 MB Jun 27, 2015 11:25 Download 788

2 Samuel 6:1-5, 12b-19 – Sewende Sondag in Koninkrykstyd – 12 Julie 2015

2Samuel6 1-5 12b-19Gebruik ‘n kis om oor die belangrikheid van die ark van die verbond te gesels. Gesels veral oor die 10 gebooie daarbinne om Dawid se dansende blydskap daaroor te verduidelik. Die preekriglyn lei die preek oor leierskap in deur die voorbeeld van Moshoeshoe, soms ook Mosjesj genoem, die stiger van die Basoetoe-nasie. In ‘n tyd van storm en drang, geweld en verwoesting, het Moshoeshoe, teen die raad en instinkte van sy mense, besluit om glad nie aan die konflik deel te neem nie en eerder te verdedig as aan te val. Hy het ’n groot kudde op sy berg opgebou en pleks van sy manne oorlog toe te stuur, het hy hulle op die lande laat werk. Moshoeshoe het nog ’n groot taboe gebreek: hy het mense uit ander taalgroepe en kulture wat in die omgewing rondgeswerf het, genooi om by sy koninkryk aan te sluit. Hulle is toegelaat om hul eie tale en tradisies te behou solank hulle lojaal was aan die koning. Dieselfde het gebeur met die eerste wit sendelinge (Eugène Casalis en Thomas Arbousset van die Paryse Evangeliese Sendinggenootskap) wat hy ingetrek het as raadgewers en bondgenote eerder as meesters of onderwysers, en die sendelinge het self ook Basotho geword. Hy het die kuns verstaan om mense saam te bind en te verenig agter 'n gemeenskaplike visie van voorspoed en vooruitgang. Dawid was presies só ‘n leier, ‘n wyse koning wat ook mense kon verenig en God in alles geraadpleeg het.

2 Samuel 6:1-5, 12b-19.ppt 1.21 MB Jun 25, 2015 15:21 Download 749
2 Samuel 6:1-5, 12b-19.pptx 687.71 KB Jun 25, 2015 15:19 Download 638
2 Samuel 6:1-5, 12b-19.doc 128 KB Jun 25, 2015 15:18 Download 883

2 Samuel 5:1-5, 9-10 – Sesde Sondag in Koninkrykstyd – 5 Julie 2015

2Samuel5 1-5 9-10As jy die hele reeks deur ’n prent van Dawid gebruik, kan jy hierdie week ’n goue kroon op sy kop plak. Gesels oor die goed waarvoor ons soms moet wag. Daar is ook inligting oor salwing wat as ‘n herinnering aan die doop uitgelê kan word. Die preekriglyn begin met die idee dat dit stryd tussen Dawid en Saul briljante stof vir 'n spannende TV-reeks kon wees. In ‘n hele paar episodes word die gang van die konflik tussen hulle ontleed en eindig dit met die vraag na die uiteindelike verskil tussen Saul en Dawid. Net dit: Dawid het met sy hele hart aan die Here sy God vasgehou. Selfs na sy owerspel met Batseba en moord op haar man, maak hy die saak met God uit. Dan loop God en Dawid die lewenspad weer verder saam. Saul het egter iewers langs sy lewenspad besluit dat hy dinge liewer op sy eie manier wil doen as om dit te doen soos die Here voorstel. Hy was vas oortuig daarvan dat hyself beter weet hoe om te lewe as wat God se voorskrifte sê. Dit sê vir ons dat dit Saul niks gebaat het dat hy fisiek kop en skouers bo almal uitgetroon het en die hele staatsmasjinerie aan sy kant gehad het nie. Omdat hy God verlaat het, het God hom ook verlaat. Daarteenoor staan Dawid wat elkeen van ons aanspoor om bewus te raak dat ons in groot geselskap leef. In Dawid se lewensverhaal sien ons hoe God mense gebruik om God se storie op aarde te skryf.

2 Samuel 5:1-5, 9-10.ppt 1.01 MB Jun 25, 2015 13:26 Download 651
2 Samuel 5:1-5, 9-10.pptx 784.55 KB Jun 25, 2015 13:25 Download 571
2 Samuel 5:1-5, 9-10.doc 110 KB Jun 25, 2015 13:25 Download 921

2 Samuel 1:1, 17-27 – Vyfde Sondag in Koninkrykstyd – 28 Junie 2015

2Samuel1 1 17-27As jy ‘n reeks oor Dawid gaan doen, stel Carolyn Brown voor dat jy ‘n prent van Dawid gebruik en elke week iets byvoeg soos die storie vorder. Hierdie week twee trane – een vir Jonatan en een vir Saul. Jy kan gesels oor vriendskap en fokus op die vriendskap tussen Dawid en Jonatan. Jy sou ook kon gesels oor die sterk gevoelens wanneer iemand hartseer is. Dit help kinders om te besef dat sulke gevoelens normaal is. Daar is ook die pragtige storie van TESS'S TREE deur Jess M. Brallier met illustrasies. Die preekriglyn begin met die begrafnisdiens van Diana, prinses van Wallis, wat deur meer as twee biljoen mense wêreldwyd gevolg is. Elton John, 'n goeie vriend van Diana, het sy hartseer en verlies tydens haar begrafnis uitgestort met die aangepaste woorde van sy lied Candle in the wind waarvan daar ‘n uittreksel geplaas is. Elton John se lied het mense woorde en begrip gegee vir die intense emosies wat hulle beleef het. Ons teks is ook so 'n publieke uitstorting van emosie en rou. Hier gaan dit oor die dood van Saul en sy seun Jonatan op Gilboaberg. Dawid gee opdrag dat sy treurlied aan die mense geleer moet word en wyd gesing moet word. Maar nes Elton John se lied, het dit ook 'n publieke boodskap oor Dawid se verwagte rol as nuwe koning. Maar Dawid se treurlied is 'n uitdrukking van sy waardering vir Saul – al is dit nie ongekwalifiseerd nie – en sy trou en respek teenoor God se volk, waarvan Saul die koning was. Dawid tree met grasie op. Publieke waardering en grasie vir die opponent, selfs die een wat jou onreg aangedoen het, skep 'n klimaat waarin die samelewing 'n veiliger, meer liefdevolle plek word. Daarom is Dawid 'n voorbeeld van 'n leier wat die historiese vyandskappe en verdeeldhede van die verlede kon help genees. In sy klaaglied leer ons 'n toekomstige koning ken wat weet hoe om mense te verenig, te inspireer en te lei.

2 Samuel 1:1,17-27.ppt 1.39 MB Jun 22, 2015 05:20 Download 719
2 Samuel 1:1,17-27.pptx 1.26 MB Jun 22, 2015 05:18 Download 674
2 Samuel 1:1,17-27.doc 147.5 KB Jun 22, 2015 05:11 Download 712

Markus 4:35-41 - Vierde Sondag in Koninkrykstyd - 21 Junie 2015

Markus4 35-41Fokus vandag in Familietyd gewoon op die dramatiese vertelling van die Bybelverhaal. Daar is ‘n skakel na ‘n oulike video wat jy kan gebruik, of instruksies vir ‘n paar eie hulpmiddels om te maak. Die preekriglyn val weg met die verhaal van Aberra Wata wat amper in Suid-Etiopië tereggestel is toe hy jeugwerk gedoen het terwyl die kommuniste aan bewind was (1974-1991). In die tronk het veral een van die wagte genot geput uit dreigemente. Eendag het daar net na middernag 'n geweldige storm losgebreek. Groot haelstene het geval wat verskeie dakke verwoes het, ook die dak van die kamer waar die spottende wag geslaap het. Dié het totaal verskrik geraak. Aberra Wata se sel het egter niks oorgekom nie. Die volgende dag is die onbeskofte wag ook in die sel gegooi, omdat die mense gedink het dat God hierdie verskriklike straf op die dorp en die tronk gestuur het weens die wag se optrede teenoor gelowiges. Die wag het daar tot inkeer gekom en nog heelwat ander mense. Dit gee ‘n goeie inleiding om te gesels oor die feit dat dienaars van die Here dikwels in doodloopstrate beland, maar dat die Here dan 'n nuwe pad vir hulle oopbreek. Soos ons in Markus lees met Jesus wat die storm op die see stilmaak. Die gedeelte is natuurlik veel meer as troos in die storms van die lewe. Dit is veral 'n oproep tot geloof aan Jesus se dissipels. Dieselfde gebeur ook met ons op die geloofsreis met Jesus. Dit is telkens weer nodig om herinner te word aan geloof en vertroue. Ons is op geen manier outomaties daarvan oortuig dat Jesus se roeping, gehoorsaamheid aan sy leer en vertroue op sy werk die regte weg is om in te slaan nie. Ons moet voortdurend herinner word, en veral wanneer ons misluk of kleingelowig raak, weer en weer hoor dat Jesus die Here is. Ons teks is egter ook 'n belofte. Die belofte is dat Jesus altyd deure vir dissipels oopmaak op God se sending. Selfs wanneer God se roeping vir sy kinders in die dood eindig, word die bloed van die martelare die saad van die kerk.

Markus 4:35-41.ppt 1.1 MB Jun 17, 2015 08:58 Download 709


For DOWNLOAD is used JotLoader component © V. Kanich 2007-2009